文｜林緯廷
出處｜公視新聞網
發布時間｜2021-09-23
嘉義縣義竹的光榮國小，欲轉型做縣內頭一間，注重囡仔心理佮品德教育的，KIST實驗小學。毋但有個人化，也會有結合在地的需求。
全校欲40位學生做伙佇台頂跳舞，嘉義縣義竹鄉的光榮國小，23這日正式轉做KIST實驗小學，未來除了課程的發展，嘛會致重囡仔心理的教育。
嘉義縣義竹鄉光榮國小校長，邱玉燕表示：「咱老師按怎去解決囡仔的，毋管是情緒方面的問題，抑是學習的問題，老師攏會詳細去聽，嘛會做伙分享，佮囡仔溝通，揣出解決的方式。」
教育處表示，美國 KIPP的教育理念，強調智識就是力量，關注弱勢族群佮品格教學，入來台灣了後，配合在地的教育元素，成做台灣的KIST，透過協助弱勢教育的民間團體，嘉義縣的偏鄉囡仔，嘛會當有無仝的教育環境。
嘉義縣教育處代理處長，李美華表示：「學習的主人應該是學生，無應該是用傳統講述的方式，袂吸引學生來學習，嘛無法度創造學生學習的熱情，阮希望會當對遮開始來改變。」
義竹鄉溪洲村長，黃君誠表示：「因為咱遮就是講足少學生，看會愈來愈鼓勵，足濟學生來遮讀冊教育，誠好。」
光榮國小是嘉義縣第一間用KIST做教育方針的學校，校長表示，學校的老師攏有教育的熱情，紲落來閣會倩專業的心理輔導人士入來學校，希望佇偏鄉學校引進包括心理課程在內的完整教育。
